Курс беларускага рубля ў латвійскім банку: 4400 за долар і 6316 за еўра

Латвійскі банк "Rietumu Banka" выставіў новы курс для беларускага рубля. Нашы грошы па безнаяўным разліку там гатовыя купляць па 4400 рублёў за долар і 6316 за еўра. Яшчэ 22 сакавіка купіць долар у гэтым банку можна было за 3750 рублёў. Менш чым за 2 тыдні ў суседняй краіне рубель дэвальваваўся на 17%, а ў адносінах да курса беларускага Нацбанка – на 44%.
У самім банку адмовіліся казаць Еўрарадыё, ці набываў нехта долары за беларускія рублі па такім курсе.

А вось у іншы латвійскі банк Svedbank прапановы з Беларусі паступалі. У мінулую пятніцу нехта па курсе больш за 4 тысячы за долар здаў 3 мільёны рублёў.
“Мы ажыццяўляем аперацыі з беларускімі рублямі, калі ёсць магчымасць, – паведамілі ў дылерскім аддзеле. – Але зараз няма попыту на беларускую валюту. З’яўляюцца індывідуальныя пакупнікі, але яны прапаноўваюць нязручны курс у параўнанні з тым, што ўсталёўвае цэнтральны банк. Так, у пятніцу здалі тры мільёны рублёў па курсе крыху больш 4 тысяч за долар. Беларускія кампаніі маюць праблемы з валютай і прапаноўваюць латышскім калегам прыняць беларускія рублі. Апошнія ж звяртаюцца да нас за кансультацыяй, і мы тлумачым, што зараз прадаць рубель амаль немагчыма”.

Яшчэ ў адным банку SEB bank курс канвертацыі – амаль 5 тысяч рублёў за долар і каля 7 тыс. рублёў за еўра. Аднак там адзначылі, што ніхто да іх з рублямі не звяртаўся, да таго ж сам банк не плануе купляць рублі.

“Сітуацыя такая, што, калі б да нас і звярнуліся, мы б наўрад ці дапамаглі. Таму што банку зараз самому складана зрабіць нейкую канвертацыю з беларускімі рублямі на міжбанкаўскім рынку. Калі ў прыватных асоб ёсць патрэба памяняць невялікія сумы, напрыклад, да 1000 долараў, мы можам гэта зрабіць. Зараз курс горшы, чым месяц таму. Зараз мы не можам нікуды рэалізаваць рублі”.

 
Яшчэ два буйныя латвійскія банкі – DNBnord і Citedele – беларускія рублі не канвертуюць увогуле.

Фота: foto.delfi.lv