Людзі пад Фаніпалем тыднямі не могуць дамагчыся адпампоўкі каналізацыі

З непрыемнай праблемай сутыкнуліся жыхары прыватных дамоў у ваколіцах Фаніпаля. Чарга на адпампоўку каналізацыі склала некалькі соцень чалавек. Чакаць паслугу даводзіцца тыднямі, піша fanipolby.

Адзін з мясцовых жыхароў расказаў у сацсетках, што звярнуўся да мінскіх прыватных кампаній. Аплата паводле камерцыйнага тарыфу склала 200 рублёў за машыну. "Чарга на адпампоўку ў водаканале каля 300 чалавек. Дайце прыватнікам зліваць адходы, як і раней", — прапанаваў ён.

Раней прыватнікі маглі зліваць адходы на ачышчальныя збудаванні Фаніпаля. Але некалькі месяцаў таму гэтыя збудаванні былі закрытыя, бо перапоўніліся карты ачысткі. Аднавіць прыём абяцаюць пасля стабілізацыі тэхналагічнага працэсу, але канкрэтныя тэрміны не называюць. Жыхарам рэкамендуюць звяртацца ў суседнія раёны.

У Водаканале Дзяржынскага раёна кажуць, што цяпер адзіны афіцыйны пункт зліву вадкіх бытавых адходаў — гэта ачышчальныя збудаванні ў Дзяржынску. Камунальнікі пацвердзілі, што ведаюць пра вялікія чэргі, і заявілі, што разглядаюць магчымасць закупіць дадатковыя асенізатарскія аўтамабілі.