Шведскаму парламентарыю адмовілі ва ўездзе ў Беларусь
Дэпутат Крысціян Хольм вядомы рэзкай крытыкай рэжыму Лукашэнкі, ён адзін з самых актыўных шведскіх дэпутатаў, якія займаюцца беларускай праблематыкай.
Дэпутату шведскага парламента ад Умеранай кааліцыйнай партыі Крысціяну Хольму адмоўлена ў беларускай візе. Пра гэта палітык паведаміў у інтэрв'ю БелаПАН.
Ён збіраўся наведаць Беларусь ужо ў канцы гэтага тыдня. Хольм планаваў сустрэцца ў Мінску з прадстаўнікамі беларускай апазіцыі, грамадзянскай супольнасці і незалежнымі журналістамі.
"Але беларускае пасольства ў Стакгольме адмовіла мне ў выдачы візы, — паведаміў Хольм. —- Матывацыя — маўляў, у мяне адсутнічае запрашэнне ад афіцыйных улад Беларусі і што я не планую сустракацца з прадстаўнікамі афіцыйнага Мінска. Хоць я і падаў у беларускае дыпламатычнае прадстаўніцтва запрашэнне ад старшыні Партыі БНФ Аляксея Янукевіча — візу так і не атрымаў..."
Паводле меркавання палітыка, рашэнне аб нявыдачы беларускай візы прымалася не на ўзроўні пасольства, а на больш высокім узроўні.
