Сямашка абяцае, што мяса і малако будуць пастаўляцца ва Украіну
Першы віцэ-прэм'ер Беларусі ў сераду ўдзельнічаў у перамовах у Кіеве з прадстаўнікамі ўкраінскага ўраду.
Паводле слоў Уладзіміра Сямашкі, перамовы былі плённыя і пытанні аднаўлення паставак беларускай мяса-малочнай прадукцыі ва Украіну будуць урэгуляваныя ў бліжэйшы час. Нібыта, засталося вырашыць яшчэ некалькі "тэхнічных момантаў". У пачатку наступнага тыдня ўкраінскую сталіцу наведае група беларускіх спецыялістаў на чале з галоўным ветэрынарных лекарам, паведамляе БЕЛТА.
Нагадаем, наша паўднёвая суседка месяц таму адмовілася ад беларускай малочнай і мясной прадукцыі. Было заяўлена што ў лютым падчас праверкі беларускіх малочных прадуктаў было выяўлена перавышэнне дапушчальных узроўняў ветэрынарных прэпаратаў. Таксама ўкраінскі бок сцвярджаў, што не атрымаў поўнай інфармацыі пра спаленне свіней 16 лютага ў вёсцы Нязнанава Навагрудскага раёну.
Фота — bymedia.net
