Школьнікаў з Жабінкі дзеля "патрыятызму" прымусілі чысціць ферму
Жабінкаўскія школьнікі на ферме / t.me/zhabinka_actualna
Жабінкаўскіх школьнікаў з ваенна-патрыятычнага клуба "Баграціён" падчас вакацый вывезлі ў вёску Арэпічы за 15 км ад райцэнтра. Там яны чысцілі малочна-таварную ферму пад наглядам намесніка начальніка па ідэалогіі РАУС Дзмітрыя Лішко, заўважылі праваабаронцы з MAYDAY.
Ідэолаг назваў дзіцячую працу "сапраўдным патрыятызмам" і "фармаваннем актыўнай грамадзянскай пазіцыі".
Клуб "Баграціён" быў створаны ў 2023 годзе ў жабінкаўскай сярэдняй школе №2 пад патранажам мясцовага РАУС.
Праваабаронцы з MAYDAY даведаліся таксама, што на гэтым тыдні ў Брэсцкай вобласці школьнікаў нечакана выклікалі на летнюю практыку тэрмінам у адзін тыдзень. Раней такая практыка не анансавалася, і частка бацькоў нават не ведае, чым будуць займацца іх дзеці.
