330 тон угнаенняў выцеклі падчас аварыі на Гродзеншчыне

Аварыйную ўцечку 330 тон карбаміда-аміячнай сумесі выявілі сілавікі ў Лідскім раёне Гродзеншчыне. Некалькіх чалавек вінавацяць у змове з мэтай схаваць факт аварыі, заяўляюць у МУС.

"З мэтай утойвання надзвычайнага здарэння 49-гадовы намеснік кіраўніка аднаго з найбуйнейшых холдынгаў вобласці і 43-гадовы дырэктар падведамаснай арганізацыі ўступілі ў злачынную змову са службовымі асобамі чатырох гаспадарак Лідскага раёна", — заявілі ў ГУБАЗіКу.

Гаворка ідзе пра вадкія карбаміда-аміячныя сумесі, якія вырабляе прадпрыемства "Гродна Азот". Яны не таксічныя і не пажаранебяспечныя.

Кіраўнікі арганізацый загадалі падначаленым паставіць зніклыя ўгнаенні на ўлік у дакументах, а потым спісаць як унесеныя на палі.

Шкода, прычыненая прадпрыемствам, ацэньваецца ў 270 тысяч рублёў. На ўсіх удзельнікаў змовы пачалі сем крымінальных справаў.