Трамп трэці раз за год прайшоў абследаванне. Белы дом зноў запэўнівае, што ён здаровы

Прэзідэнт ЗША Дональд Трамп трэці раз за апошнія 13 месяцаў наведаў ваенны медыцынскі цэнтр Walter Reed для медыцынскага абследавання. На фоне набліжэння яго 80-годдзя і ўсё большай увагі да стану здароўя кіраўніка дзяржавы гэтая паездка выклікала новыя пытанні ў амерыканскіх медыя і сярод незалежных экспертаў.  

Пасля трохгадзіннага абследавання Белы дом апублікаваў заключэнне асабістага лекара Трампа. У ім сцвярджаецца, што прэзідэнт знаходзіцца ў «выдатным стане здароўя» і цалкам здольны выконваць свае абавязкі. Таксама паведамляецца, што ён зноў набраў максімальны бал у тэсце на кагнітыўныя здольнасці.  

Разам з тым апошнія месяцы ў ЗША актыўна абмяркоўваюцца ацёкі на нагах і сінякі на руках Трампа. У Белым доме тлумачаць гэта ўзроставай вянознай недастатковасцю, прыёмам аспірыну і частымі поціскамі рук. Аднак незалежныя лекары ставяць пад сумнеў гэтыя тлумачэнні і звяртаюць увагу, што сінякі рэгулярна з’яўляюцца нават на левай руцэ Трампа, якой ён звычайна не вітаецца. Акрамя таго, медыкі кажуць, што незвычайна частыя абследаванні могуць сведчыць пра назіранне за нейкай хранічнай праблемай са здароўем. Пра гэта падрабязна піша The Washington Post.