Тых, хто не ўмее працаваць на ўборачнай, адправяць на мяжу з Украінай — Лукашэнка

Аляксандр Лукашэнка даручыў адпраўляць у войска і на мяжу з Украінай тых, хто дрэнна працуе ў сельскай гаспадарцы ў перыяд уборачнай кампаніі. Адпаведную пагрозу ён агучыў на селектарнай нарадзе 21 ліпеня.

"Ну чаго мы будзем пры дэфіцыце кадраў кайданкі апранаць? Папрасіце Хрэніна, даручэнне яму маё перадайце: усіх, хто не ўмее працаваць, — у войска і на паўднёвую мяжу. У лес. Там нашыя хлопцы, сілы спецыяльных аперацый, на мой загад раззасяроджаныя па ўкраінскай мяжы", — заявіў Лукашэнка.

Пры гэтым ён дадаў, што байцы сілаў спецаперацый знаходзяцца на мяжы не для таго, каб рыхтаваць напад, а толькі дзеля бяспекі.

"Нялёгка — камарыкі, мухі, мошкі ды іншае. Вось туды іх, у войска. Звычайныя салдаты. Тыдзень падрыхтоўкі (гранатамёт, кулямёт), і туды — у распараджэнне сіл спецыяльных аперацый", — удакладніў свае намеры ён.

Таксама Лукашэнка загадаў адпраўляць у войска чыноўнікаў, якія "не выканаюць даручэнні".

"Любы чыноўнік (ва ўрадзе, аблвыканкаме, райвыканкаме) — у гаспадарку на трактар, камбайн. Не ўмееш гайкі круціць? Будзеш памочнікам, будзеш падносіць "снарады". Любое невыкананне — у войска. Хай там служыць. У лесе будзе сядзець. Там таксама патрэбныя кадры. Няхай у перыяд уборкі там паслужыць. І чыноўнік, і той, хто не хоча працаваць", — прыгразіў кіраўнік дзяржавы.