У Быдгашчы затрымалі мужчыну і жанчыну, якія напалі на сям'ю беларусаў

У Быдгашчы паліцыя затрымала мужчыну і жанчыну, якія 18 ліпеня справакавалі канфлікт з мужам і жонкай з Беларусі. Ім інкрымінуюць публічную абразу на глебе нацыянальнай прыналежнасці і парушэнне цялеснай недатыкальнасці, піша выданне MOST са спасылкай на гарадскую камендатуру Быдгашча. За гэта пагражае да трох гадоў пазбаўлення волі.

Як паведамлялася раней, польская пара справакавала канфлікт на прыпынку грамадскага транспарту, абражаючы беларусаў на нацыянальнай глебе (іх прынялі за ўкраінцаў). Беларусцы пры гэтым мэтанакіравана аплявалі са спіны кофту, а з яе мужам развязалі бойку. Пры гэтым у беларуса ў крыві быў увесь твар і майка.

У той жа дзень паліцыя выявіла і затрымала палякаў, якія ўдзельнічалі ў канфлікце — 42-гадовага мужчыну і 31-гадовую жанчыну. Абое з'яўляюцца жыхарамі Быдгашча. 20 ліпеня пракурор прызначыў ім паліцэйскі нагляд.