У аптэках Беларусі знік прэпарат жалеза

У аптэках Беларусі пакупнікі не могуць знайсці прэпарат "Ферэтаб комп", заўважыла выданне hrodna.life. Гэта сродак з жалезам і фоліевай кіслатой, якое ўжываюць для лячэння і прафілактыкі жалезадэфіцытнай анеміі і схаванага дэфіцыту жалеза. У Беларусі ён прадаецца без рэцэпту.

Паводле інфармацыі сайта 103.by, цяпер гэтага прэпарата няма ні ў адной аптэцы Беларусі.

Мінчанка Наталля яшчэ 16 чэрвеня пыталася на сайце Tabletka.by, калі "Ферэтаб комп" з'явіцца ў сталічных аптэках. Ёй адказалі, што будзе толькі ў чацвёртым квартале.

Прэпарат мае бестэрміновую рэгістрацыю ў Беларусі. Імаверна, лекі маглі знікнуць з продажу праз праблемы з якасцю асобных паставак.

Напрыклад, у жніўні 2025-га Мінздароўя пастанавіла выключыць з абарачэння дзве канкрэтныя партыі капсул "Ферэтаб комп" аўстрыйскага вытворцы G. L. Pharma GmbH. Іх прызналі няякаснымі праз неадпаведнасць паказчыкаў колькаснага вызначэння двухвалентнага жалеза.

Таксама месцамі з аптэк зніклі і іншыя прэпараты жалеза. Адна з карыстальніц сацсеткі Threads не змагла купіць у Шчучыне "Тардыферон" — яна плануе ехаць па лекі ў Гродна: "Учора не змагла купіць Тардыферон у Шчучыне, давядзецца ехаць за 60 км у Гродна, там нібыта ёсць. Мне ён выдатна падымае ферытын і ўзровень жыцця заадно".

Іншая карыстальніца падзялілася лайфхакам, што месяц таму знайшла "Ферэтаб" у Баранавічах, а потым заказала прэпарат з Расіі — праз тэлеграм-чаты.