У Кыргызстане сёння праходзяць парламенцкія выбары

У Кыргызстане сёння пачалося галасаванне на выбарах новага складу парламенту, паведамляе БЕЛТА са спасылкай на інфармагенцтвы. Паводле звестак Цэнтральнай выбарчай камісіі, амаль 2 300 выбарчых участкаў адчыніліся сёння а 8.00 паводле мясцовага часу і будуць працаваць да 20.00. Парога яўкі выбаршчыкаў паводле новага заканадаўства не існуе, таму выбары будуць прызнаныя адбытымі пры любой колькасці людзей, што прагаласуюць. У Кыргызстане права голасу маюць прыкладна 2 мільёны 850 тысяч чалавек. На 120 месцаў у новым парламенце краіны прэтэндуюць 29 партыяў. Для таго, каб увайсці ў Вярхоўны Савет, ім трэба пераадолець 5-адсоткавы бар’ер, а таксама набраць не меней за паўадсотка галасоў выбаршчыкаў.

Папярэднія вынікі галасавання абвесцяць цягам найбліжэйшых 2-3 дзён, пасля таго як паступяць пратаколы з усіх выбарчых камісіяў, у тым ліку з тых, што знаходзяцца ў цяжкадаступных горных раёнах.