У "Дукорскім маёнтку" раптоўна адмянілі Купалле

У музейным комплексе "Дукорскі маёнтак" пад Мінскам раптам адмянілі святкаванне Купалля, запланаванае на 28 чэрвеня. Пра гэта адміністрацыя паведаміла ў сваіх сацсетках, заўважыла выданне CityDog.

Прычына адмены не называецца. Грошы за квіткі, набытыя анлайн праз BezKassira, можна вярнуць у асабістым кабінеце. Запісы на трансфер абяцаюць адмяніць аўтаматычна.

"28.06.2026 "Дукорскі маёнтак" па-ранейшаму чакае ўсіх у госці на аглядныя экскурсіі, прагулкі па 200-гадовым парку і вясёлае баўленне часу на 25 га комплексу з 10:00 да 19:00", — дадала каманда комплексу.

Пры канцы траўня "Дукорскі маёнтак" трапіў у гучны скандал. Адна з беларусак апублікавала ў сацсетках відэа, у якім даказвала, што жывёлы ў комплексе ўтрымліваюцца ў неналежных умовах. Яна заяўляла, што алені выглядаюць худымі і хворымі, а таксама знайшла яка з сур’ёзнай ранай на целе.

Відэа хутка стала вірусным, і ў "Дукорскі маёнтак" прыехала праверка з Мінпрыроды. Інспектары не знайшлі парушэнняў ва ўмовах утрымання жывёлаў. Аднак былі выяўленыя парушэнні рэгістрацыі дзікіх жывёлаў у няволі, а таксама парушэнні прыродаахоўнага заканадаўства па абыходжанні з адходамі.