Той, хто атакаваў аўтобус, хацеў сутыкнуць Беларусь з Украінай — Вальфовіч
Беларускі аўтобус пасля дронавай атакі / Ягор Кавальчук
Ужо апытаныя ўсе сведкі па справе аб атацы дрона на беларускі аўтобус у Бранскай вобласці. Пра гэта журналістам расказаў дзяржсакратар Савета бяспекі Аляксандр Вальфовіч.
Пры гэтым ён не стаў вінаваціць украінцаў ва ўдары. Паводле Вальфовіча, гэта была спроба правакацыі.
"Але той, хто здзейсніў гэты ўдар, спрабаваў стварыць падставу для таго, каб сутыкнуць Беларусь з Украінай, справакаваць нейкую нядобрую сітуацыю", — заявіў дзяржсакратар Савета бяспекі.
Ён дадаў, што расследаваннем займаюцца беларускія спецслужбы і Следчы камітэт. "Ёсць ужо пэўныя, скажам так, моманты, пра якія будзе даложана кіраўніку дзяржавы. Рашэнне будзе прынята. Але ўцягнуць Беларусь у канфлікт не атрымаецца", — дадаў Вальфовіч.
17 чэрвеня аўтобус з дзіцячай футбольнай камандай з Рэчыцы трапіў пад дронавую атаку ў Бранскай вобласці. Былі параненыя шэсць чалавек, загінула жанчына — жонка аднаго з трэнераў.
Расійскія ўлады і Лукашэнка ўжо заявілі, што за атакай стаяць Узброеныя Сілы Украіны. У Генштабе УСУ абверглі датычнасць да гэтага ўдару.
