Вынесены прысуд мужу і жонцы Ліпскім, якія рыхтавалі забойства паўсотні чалавек

Мінскі абласны суд 6 ліпеня вынес прысуд мужу і жонцы Уладзіміру і Раісе Ліпскім. Іх абвінавачвалі ў падрыхтоўцы забойстваў 52 чалавек. Справу разглядалі больш за чатыры месяцы.

Раісе Ліпскай прысудзілі 22 гады калоніі, Уладзіміру — 24 гады. Іх судзілі па абвінавачанні ў незаконных дзеяннях са зброяй; забойстве, учыненым групай асоб; замаху на злачынства ды інш.

Сын Ліпскіх Аляксандр у 2018 годзе зламаў палец суседу па пад'ездзе. За гэта ён быў асуджаны на 4 гады "хіміі", але неўзабаве схаваўся. За ім знікла і маці. Пазней выявілася, што ўся сям'я рыхтавала масавыя забойствы. Як адзначае следства, Ліпскія хацелі папомсціцца ўсім людзям, датычным да крымінальнай справы, па якой асудзілі іх сына.

Зламыснікі сачылі за патэнцыяльнымі ахвярамі, рыхтавалі маскіроўку (парыкі, змену вопраткі, кійкі) і зброю (пісталеты, патроны, глушыцелі, самаробныя гранаты і боепрыпасы). У 2021 годзе іх сын Аляксандр застрэліў 33-гадовую мінчанку — сваячку таго суседа, якому ён зламаў палец.

Затрымалі сям'ю Ліпскіх улетку 2024 года. Пры затрыманні Аляксандр Ліпскі атрымаў смяротнае раненне.