Суддзю, датычную да палітычных рэпрэсій, выгналі за правіну, несумяшчальную з дзяржслужбай

Суддзю Аршанскага суда і Оршы Іну Кохаву звольнілі з працы ўказам Аляксандра Лукашэнкі. Прычынай называецца ўчыненне правіны, несумяшчальнай са знаходжаннем на дзяржаўнай грамадзянскай службе.

Як заўважыла "Наша Ніва", Кохава ўдзельнічала ў рэпрэсіях мінімум з 2011 года. У базе праваабаронцаў знайшлося больш за дзесяць вынесеных ёй рашэнняў па палітычных адміністратыўных пратаколах і пяць прысудаў па палітычных крымінальных справах.

Акрамя таго Кохава займалася справамі палітвязняў у калоніі строгага рэжыму ў Оршы. Яна прысуджала ім дадатковае пакаранне і пераводзіла на турэмныя ўмовы. Так, у лютым 2025 года Кохава судзіла анархіста Аляксандра Францкевіча.

У Беларусі суддзя агульнай юрысдыкцыі можа працаваць да 65 гадоў. Кохаву адправілі ў адстаўку ў 60 гадоў.