"Будзем выкараняць да канца" — Гігін сказаў пра закрыццё крамаў з беларускай сімволікай

Улады і надалей будуць займацца ідэалагічнай "зачысткай". Пра гэта дэпутат Палаты прадстаўнікоў Нацыянальнага сходу, дырэктар Нацбібліятэкі Вадзім Гігін заявіў на стрыме ў яшчэ аднаго прапагандыста Рыгора Азаронка. Так ён пракаментаваў нядаўняе закрыццё крамаў з таварамі з нацыянальнай сімволікай, а таксама адмену фэсту-рэканструкцыі "Наш Грунвальд".

Паводле Гігіна, гэта працяг той барацьбы, якую рэжым вядзе з 2020 года. "Не будзе гэтага больш. Мы ўсе разумеем і ўсё бачым. Гэтыя спробы сказаць: "Ну калі ж ужо ўлада супакоіцца? У іх траўма 20-га года. Ці будзе адліга?" Будзе вам па галаве адліга. Будзем выкараняць да канца. І тое, што вы там верашчыце, тое, што вы там панікуеце, што ў вас крывыя твары, — нам гэта кажа, што мы ўсё робім правільна", — цытуе выданне "Зеркало" словы прапагандыста.

Пры гэтым ён дадаў, што закрыццё крамаў з нацыянальнай сімволікай і адмена рэканструктарскага фэсту — гэта яшчэ не фінал. Гігін нагадаў, як у Мінску сілавікі зачынілі недзяржаўную кнігарню "Кнігаўка" адразу пасля адкрыцця. "Мы гэта рабілі і памятаем добра, як гэта было. Так і далей будзе. Калі вы думаеце, што мы нюх страцілі, калі вы думаеце, што не бачым тое, што вы спрабуеце тут укараніць, то ўсё мы бачым", — падкрэсліў ён.

А Азаронак у сваю чаргу дадаў, што рэгулярна маніторыць інтэрнэт, вышукваючы крамолу: "Мне не лянота сядзець і глядзець, дзе што прадаюць, дзе якія паэткі збіраюцца выступаць".

Як паведамлялася раней, цягам тыдня ў Мінску зачыніліся этнакрама Ragna, а таксама вядомыя беларускія брэнды адзення HONAR і LSTR Adzieńnie. Таксама пра адмену фэсту "Наш Грунвальд", які мусіў адбыцца пры канцы ліпеня ў "Дудутках", абвясцілі арганізатары.