Чарнагорыя плануе адмяніць бязвіз для беларусаў і расіян з кастрычніка

Ад 1 кастрычніка Чарнагорыя можа ўвесці візавы рэжым для грамадзян Беларусі і Расіі. Пра гэта піша мясцовае выданне DAN са спасылкай на крыніцу ва ўрадзе, заўважыла DW.

Гэтую меру называюць часткай дастасавання візавай палітыкі Чарнагорыі да правілаў Еўрасаюза.

Цяпер беларусы і расіяне могуць наведваць Чарнагорыю без візы на тэрмін да 30 дзён.

Раней прэзідэнт краіны Якаў Мілатовіч казаў, што бліжэйшым часам плануецца прывесці візавыя правілы ў адпаведнасць з патрабаваннямі ЕС. Кіраўніцтва Чарнагорыі доўга адкладала гэты крок, бо ён можа істотна паўплываць на турыстычны сектар.

Выдаваць візы Чарнагорыя плануе праз кампанію VFS Global — гэта найбуйнейшае ў свеце агенцтва, якое спецыялізуецца на такіх паслугах.