Працоўныя мігранты з Узбекістана ўжо размеркаваныя па прадпрыемствах — кіраўнік МУС

Працоўныя мігранты, якія прыбылі з Узбекістана, "ужо размеркаваныя па прадпрыемствах і арганізацыях Віцебскай вобласці". Пра гэта падчас працоўнай нарады паведаміў міністр унутраных спраў Іван Кубракоў, перадае прэс-служба МУС.

Кубракоў расказаў, што узбекскіх мігрантаў паслалі ў першую чаргу на прадпрыемствы аграпрамысловага комплексу. Міліцыя правяла з імі мерапрыемствы для прафілактыкі правапарушэнняў і злачынстваў.

Міністр дадаў, што 250 працоўных мігрантаў не ўплываюць на грамадскую бяспеку і сацыяльна-палітычную абстаноўку ў краіне.

Рэжым Лукашэнкі заклапочаны недахопам працоўных рук, таму спрабуе закрыць праблемныя месцы мігрантамі. Летась Лукашэнка хацеў запрасіць на працу ў Беларусь 150 тысяч працоўных мігрантаў з Пакістана, але за год прыбылі толькі каля 300 чалавек. Сёлета ён дамовіўся з прэзідэнтам Узбекістана Шаўкатам Мірзіёевым аб прыездзе працоўных мігрантаў з гэтай краіны.

Першая партыя з 250 мігрантаў прыбыла ў Беларусь 13 ліпеня. 15 ліпеня ў сацсетках завірусілася відэа групы мігрантаў, якія расказвалі пра ўмовы працы ў Беларусі: ім прапанавалі заробак 500 долараў, але за жыллё і харчаванне плаціць давядзецца самастойна. Яны казалі, што пры такіх умовах гатовыя адмовіцца ад працы і вярнуцца на радзіму.

Пазней у інтэрнэце з'явіўся новы зварот ад аднаго з работнікаў. Ён заявіў, што папярэдні ролік быў зняты ў першы дзень пасля прыезду і папрасіў яго не распаўсюджваць. Мужчына сказаў, што цяпер мігрантам прапанавалі лепшыя ўмовы.