Добраахвотнік "Лахвіч" расказаў, як яму пагражалі згвалтаваннем

Добраахвотнік Аляксандр "Лахвіч" Наўковіч расказаў пра канфлікт, падчас якога яго вымусілі пагаліцца і запісаць "пакаяннае відэа".

Баец трапіў у так званую "мядовую пастку": на кватэру яго завабілі праз дзяўчыну. Як кажа Лахвіч, калі ён прыехаў на кватэру, то пайшоў у душ. І тады ўвайшлі адразу пяць чалавек, якія сталі яму пагражаць: "Мне прапанавалі: ці мы, выбачайце, цябе вы*бем у сраку, ці ты паголішся".

Гэтыя пяць чалавек, што прыйшлі здзекавацца над ім, — беларускія добраахвотнікі, кажа Наўковіч. Ён назваў двух чалавек — гэта Радзівон "Гена" Батулін і Дзяніс "Ваўкалак" Урбановіч.

Акрамя прэсінгу ўдзельнікі нападу спампавалі перапіскі з тэлефона Наўковіча і заявілі, што ёсць спіс "наступных".

Добраахвотнік кажа, што паспрабуе вырашыць усё "праз суд, па справядлівасці".

"Пакаяннае" відэа выйшла ў сацсетках "Лахвіча" 31 траўня. Як кажа добраахвотнік, ён так доўга не распавядаў усю гісторыю праз псіхалагічную траўму.