На якім месцы знаходзіцца Мінск у спісе самых дарагіх гарадоў свету?

Сервіс Numbeo абнавіў сусветны рэйтынг гарадоў па кошце жыцця. У яго ўвайшлі 547 гарадоў, у тым ліку Мінск, які размясціўся на 455-м месцы.

Рэйтынг грунтуецца на індэксе кошту жыцця. Пры яго разліку ўлічваюцца выдаткі на прадукты, харчаванне ў кафэ і рэстаранах, транспарт, камунальныя паслугі і іншыя паўсядзённыя траты. Пры гэтым кошт арэнды жылля, іпатэка і купля нерухомасці ў разлік не ўваходзяць.

Самым дарагім горадам свету аналітыкі зноў прызналі Цюрых (Швейцарыя). Следам размясціліся Джорджтаўн (Кайманавы астравы) і яшчэ адзін швейцарскі горад — Люцэрн. Усяго ў першай дзесятцы апынулася адразу восем гарадоў Швейцарыі. Адзіным прадстаўніком ЗША ў топ-10 стаў Ганалулу на Гаваях. Пры гэтым Нью-Ёрк, які Numbeo выкарыстоўвае як базавы горад для параўнання коштаў, заняў толькі 12-е месца.

З буйных еўрапейскіх гарадоў Лондан апынуўся на 24-й пазіцыі, Парыж — на 49-й, Берлін — на 101-й, Рым — на 250-й, Барселона — на 251-й, а Прага — на 268-й.