"За намі нават замацавалі таксі" — работнікі з Узбекістана сказалі пра цяперашнія ўмовы

Ніхто з працоўных мігрантаў не вярнуўся з Беларусі назад ва Узбекістан. А тым, хто скардзіўся на ўмовы, памянялі працадаўцу. Пра гэта супрацоўніца агенцтва міграцыі пры Кабміне Узбекістана заявіла ў каментары выданню "Зеркало".

13 ліпеня ў нашу краіну прыбылі 255 жыхароў Андыжанскай вобласці Узбекістана, каб працаваць у сферы сельскай гаспадаркі і жывёлагадоўлі. 15 ліпеня ў інтэрнэце вірусна разляцеўся відэаролік, у якіх мужчыны скардзіліся на нізкі заробак і кепскія ўмовы.

Прадстаўніца агенцтва міграцыі кажа, што пасля скаргаў у сацсетках адбылася праверка, ці выконваюць працадаўцы ўмовы працоўных дамоваў: "Для грамадзян, умовы працы якіх не адпавядалі дагаворным абавязацельствам, прыняты неабходныя меры, уключаючы іх перавод да іншых працадаўцаў, якія забяспечваюць прадугледжаныя дагаворам умовы працы і ўзровень аплаты".

Наконт брудных пакояў, на якія скардзіліся прыезджыя, чыноўніца адказала лаканічна: "Ужо перавялі. Не ўсе працадаўцы аднолькавыя".

У відэасюжэце наваполацкага дзяржаўнага канала "Звязда" можна бачыць, што мігрантаў засялілі ў інтэрнат завода "Палімір". Яны хваляць умовы, у якіх аказаліся. Адзін з мужчын кажа, што яны дамовіліся на заробак у 850 долараў пры двух выходных. "Калі працаваць у суботу і нядзелю, будзе больш, у раёне тысячы. Цяпер працадаўца вывез нас і купіў сім-карты. Далі жыллё, тры разы на дзень ямо ў сталовай", — дзеліцца ён падрабязнасцямі.

Іншы таксама задаволены ўмовамі: "Кожны дзень тры разы прыходзім сюды есці. За намі нават замацавалі таксі".

Агулам у Беларусь цягам бліжэйшых месяцаў плануецца прывезці пяць тысяч працоўных мігрантаў з Узбекістана.