"Дыскрэдытаваных" былых сілавікоў, ратавальнікаў і дыпламатаў будуць адсочваць пяць гадоў
Кантраляваць іх будуць двойчы на год / Генпракуратура Беларусі
"Дыскрэдытаваных" былых сілавікоў, ратавальнікаў і дыпламатаў будуць адсочваць пяць гадоў. Гэта прапісана ва ўказе ад 9 ліпеня 2026 № 230, які падпісаў Лукашэнка.
Згодна з новым дакументам, не радзей двойчы на год улады будуць адсочваць працаўладкаванне звольненых "па дыскрэдытуючых абставінах" з сілавых ведамстваў або дыпламатычнай службы.
Калі гэтых людзей будуць прымаць на кіруючыя пасады не толькі ў дзяржаўныя, але і ў прыватныя арганізацыі, гэтая інфармацыя будзе накіроўвацца ў выканкамы "для прыняцця мер рэагавання ў адпаведнасці з заканадаўствам". Якія меры ў такім выпадку прадугледжаны заканадаўствам, не ўдакладняецца.
"Па дыскрэдытуючых абставінах" звальняюць не толькі за хабары або іншыя злачынствы, але і за палітычную нелаяльнасць.
Прамой забароны на працаўладкаванне ва ўказе не прапісана, аднак дэ-факта яна існуе. Як і "чорныя спісы" работнікаў, у якія ўваходзяць тысячы тых, хто ніколі ні за што не прыцягваўся да адміністратыўнай або крымінальнай адказнасці.
