Кыргызстан застаўся без расійскага паліва і нацэліўся на беларускае

Расійскі ўрад абмежаваў экспарт паліва з краіны на фоне паспяховых атак Украіны на нафтаперапрацоўчыя заводы. З-за дэфіцыту на рынку Расія вымушана закупляць бензін і дызель у іншых краінах, у тым ліку і ў Беларусі. З праблемамі сутыкнуліся і тыя краіны, у першую чаргу ў Цэнтральнай Азіі, якія залежалі ад расійскіх паставак.

Паводле дадзеных Reuters, да 90% усяго бензіну Кыргызстан атрымліваў з Расіі. Цяпер урад краіны шукае іншых пастаўшчыкоў, у тым ліку звярнуўшыся да Кітая, Казахстана і Беларусі.

"Цяпер мы на сваім узроўні распрацоўваем механізмы і шляхі лагістыкі — як менавіта дастаўляць гэтае паліва з Беларусі ў Кыргызстан. Перамовы з Беларуссю праведзены, аб'ёмы ўзгоднены", — заявіў міністр энергетыкі Кыргызстана Алтынбек Рысбекаў, піша Reform.news.

Кыргызстан разлічвае імпартаваць з Беларусі 60-70 тысяч тон паліва штомесячна.

У сярэднім за месяц беларускія НПЗ вырабляюць каля 300 тысяч тон бензіну, пры гэтым унутранае спажыванне складае каля 100 тысяч тон.