Спіс дармаедаў Бешанковіцкага раёна больш як напалову фіктыўны — праваабаронцы
Акцыя пратэсту супраць "дармаедскага" заканадаўства, архіўнае фота / Еўрарадыё
Рэальная колькасць "дармаедаў" у Беларусі ў некалькі разоў меншая, чым падае афіцыйная статыстыка. Гэта заўважылі праваабаронцы з "Віцебскай Вясны"
Напрыклад, у Бешанковіцкім раёне мясцовая камісія па садзеянні занятасці насельніцтва заявіла, што на тэрыторыя раёна зарэгістраваныя 1274 чалавекі, "не занятыя ў эканоміцы". Але выявілася, што 408 з іх жывуць і працуюць у Расіі, а яшчэ 332 чалавекі таксама выехалі за мяжу або іх рэальнае месца знаходжання не вядомае.
Аказалася, што больш за палову "дармаедаў" — людзі, якія рэальна не жывуць у Бешанковіцкім раёне.
Дарэчы, тым, хто афіцыйна не мае працы больш за два гады, у раёне пагражаюць кантрольным візітам: падатковая і іншыя службы будуць правяраць, на якія грошы жыве "дармаед", што купляе і г.д.
З тымі ж, хто злоўжывае алкаголем і не хоча шукаць сабе працу свядома, будзе разбірацца міліцыя. Яна мае дзве "выхаваўчыя" меры — прымусовая "добраахвотная" праца па прыбіранні тэрыторыі ды "прафілактычныя" гутаркі.
