Беларуская чыгунка шукае работнікаў у Непале і Пакістане

Беларуская чыгунка (БЧ) шукае работнікаў у Непале і Пакістане. Хаця яшчэ ўвосень 2025-га на БЧ заяўлялі, быццам прыцягваць замежнікаў да працы немэтазгодна і гэта выкліча напружанасць у калектывах.

Як заўважыла Супольнасць чыгуначнікаў Беларусі, сёлета ў красавіку Мінскае аддзяленне БЧ афіцыйна звярнулася ў рэкрутынгавую кампанію "Станапрынт Інтэрнэшнл", зарэгістраваную толькі ў сакавіку 2026 года. Чыгунка просіць замежных работнікаў на вакансіі, "якія не патрабуюць высокай кваліфікацыі". Асобна згадваецца, што валоданне рускай мовай не абавязковае.

Мінскае аддзяленне прапануе наступныя вакансіі: манцёры шляху (20 чалавек), станцыйныя рабочыя (8 чалавек), мыйшчыкі-прыбіральшчыкі рухомага саставу (8 чалавек). Гэта найбольш фізічна цяжкія і нізкааплатныя работы. Там не патрабуецца спецыяльнай адукацыі і ўпэўненага валодання мовамі. Ім прапануюць плаціць заробкі па 950-980 рублёў.

У кампаніі "Станапрынт Інтэрнэшнл" адзначылі, што на такія заробкі работнікаў не знойдзецца: "Вашыя стаўкі (950-980 BYN) недастатковыя для фармавання матывацыі". Рэкруцёры прапанавалі плаціць работнікам з Непала і Пакістана мінімум 1500 рублёў "чыстымі" на рукі, а таксама ўключыць адпаведныя даплаты за перапрацоўкі і звышурочныя.

У Супольнасці чыгуначнікаў звяртаюць увагу, што ў той жа час беларускім чыгуначнікам пастаянна ўразаюць прэміяльныя і даплаты, дадаюць абавязкі скарочаных ці звольненых работнікаў і шукаюць розныя крыніцы "аптымізацыі".

Дарэчы, згодна з пададзенай камерцыйнай прапановай агульныя выдаткі на аднаго гастарбайтара складуць каля 2900-3200 рублёў. Акрамя выплаты заробку наймальнік будзе абавязаны аплаціць падбор кандыдатаў самой ТАА "Станапрынт Інтэрнэшнл", кампенсаваць авіяквіткі для работнікаў, забяспечыць іх пражыванне, аплачваць суправаджэнне, медстрахоўкі, пры неабходнасці — паслугі перакладчыкаў, а таксама арганізоўваць рэгістрацыю мігрантаў і правядзенне медкамісій. Як падлічылі ў супольнасці чыгуначнікаў, толькі кампенсацыйны пакет пасля працаўладкавання складзе да 2440 рублёў на чалавека.

Праблема з кадрамі стала адчувацца на БЧ асабліва востра пасля 2020 года, калі пачаліся палітычныя чысткі "нелаяльных" работнікаў.