Каля 100 тысяч еўра кампенсацыі атрымае беларус, затрыманы ў Славеніі па спісе Інтэрпала

Каля 95 тысяч еўра атрымае ад Славеніі беларус, якога там затрымалі і хацелі дэпартаваць на радзіму. Мужчына правёў пад вартай 396 дзён, піша "Наша ніва".

Беларус быў затрыманы ў ліпені 2011 года на харвацка-славенскай мяжы. Затрыманне адбылося па чырвонай картцы Інтэрпала, выдадзенай па запыце Мінска. Мужчыну арыштавалі і пачалі працэс дэпартацыі.

Славенскія суды двойчы дазвалялі экстрадыцыю мужчыны ў Беларусь, але Канстытуцыйны суд Славеніі адмяняў рашэнні і вяртаў справу на новы разгляд. Толькі ў жніўні 2012-га суды канчаткова пастанавілі адмовіць у выдачы і вызваліць беларуса.

Да арышту мужчына каля 21 года жыў і працаваў у Германіі, дзе меў працоўны кантракт. Праз зняволенне ён страціў працу. Падчас затрымання на памежным пераходзе паліцэйскі без заўважнай падставы навёў яму на галаву пісталет на вачах у жонкі і дзяцей. У няволі мужчына быў разлучаны з жонкай і двума непаўналетнімі дзецьмі трох і дзевяці гадоў, прычым адно з дзяцей цяжка хварэла. Паведамляецца, што беларус схуднеў і ў яго развіўся разлад адаптацыі, наступствы якога ён, як прызнаў суд, адчуваў і праз дзесяць гадоў.

Наш суайчыннік прасіў кампенсацыю ў памеры 166 тысяч еўра. Акруговы суд Любляны прызначыў 35 800 еўра — 25 тысяч за маральную шкоду і 10 800 еўра за страчаны заробак. Пасля апеляцыі суму маральнай кампенсацыі беларусу знізілі да 19 800 еўра — маўляў, дзяржава не адказвае ні за акалічнасці самога затрымання, ні за страх перад выдачай у Беларусь.

Але Вярхоўны суд Славеніі з гэтым не пагадзіўся. Ён прызнаў прыніжэннем годнасці настаўлены пісталет і заявіў пра абгрунтаваны страх перад высылкай у Беларусь, "дзе дагэтуль дзейнічае смяротнае пакаранне і нізкі ўзровень павагі да правоў чалавека". Таму Вярхоўны суд павялічыў кампенсацыю за маральную шкоду да 36 230 еўра. Разам з кампенсацыяй за страчаны заробак агульная сума склала 47 030 еўра.

Да гэтага дадасца яшчэ і пеня за амаль дзесяць гадоў. Паводле прыблізных падлікаў, адны толькі адсоткі са жніўня 2015 года складаюць каля 46 тысяч еўра. Такім чынам, разам з судовымі выдаткамі агульная сума, якую Славенія мусіць выплаціць беларусу, набліжаецца да 95 тысяч еўра.