Кіраўніка рэспубліканскай ДАІ Аляксандра Мендзелева адправілі ў адстаўку

У цяперашні час абавязкі начальніка ўпраўлення Дзяржаўтаінспекцыі МУС Беларусі часова выконвае Васіль Бульбянкоў.

Пра гэта паведамілі ў Міністэрстве ўнутраных спраў. Былы начальнік Аляксандр Мендзелеў, які ўзначальваў дадзеную службу з пачатку 2006 года адпраўлены ў адстаўку. Калі было прынята такое рашэнне не паведамляецца, аднак пра гэта стала вядома толькі цяпер. Бульбянкоў з 2004 па 2008 год ўзначальваў мінскую ДАІ.

Затым стаў намеснікам начальніка рэспубліканскай дзяржаўтаінспекцыі. Аб прычынах адстаўкі Мендзелева 11 лістапада распавёў на старонках "Савецкай Беларусі" міністр унутраных спраў Уладзімір Навумаў.

Паводле яго слоў, ранейшае кіраўніцтва ДАІ не справілася з арганізацыяй асветы на ўсіх узроўнях. На думку міністра, сёння ДАІ павінна актыўна займацца раннім папярэджаннем аварыйнасці.

"Напрыклад, калі асвета кіроўцаў яшчэ больш-менш вядзецца, то пешаходы правіл амаль не ведаюць і не выконваюць, да сваёй бяспекі ставяцца безадказна. Вядома, выпраўляць гэтую сітуацыю варта на ўзроўні школ і прадпрыемстваў, але арганізаваць такую працу павінна менавіта Дзяржаўтаінспекцыя", — канстатаваў Навумаў.

Міністр таксама паведаміў, што новая кандыдатура на пасаду кіраўніка рэспубліканскай ДАІ яшчэ не разглядалася.