"Еўрапейскі выбар" растлумачыў, чаму Мамаеву выключылі са свайго спісу ў КР

Выбарчы спіс Каардынацыйнай рады "Еўрапейскі выбар" у каментары для Еўрарадыё растлумачыў, чаму вынес вотум недаверу Аляксандры Мамаевай.

"Рашэнне аб вынясенні вотуму недаверу адной з чальцоў нашага спісу было прынята кваліфікаванай большасцю пасля разгляду зваротаў калег і абмеркавання акалічнасцяў, якія прывялі да страты даверу і, нажаль, зрабілі далейшае супрацоўніцтва немагчымым.

Падчас пасяджэння былі разгледжаны пытанні, звязаныя з захаваннем канфідэнцыяльнасці, выкананнем калектыўных рашэнняў, узаемадзеяннем унутры каманды і выкананнем прынцыпаў прафесійнай этыкі. Па сутнасці агучаных пытанняў спадарыні Мамаевай была прадастаўлена магчымасць даць тлумачэнні, аднак яна адмовілася ад каментароў.

Пасля абмеркавання, па ініцыятыве чальцоў спісу, пытанне аб вотуме недаверу было вынесена на галасаванне і падтрымана трыма чвэрцямі галасоў.

Для Еўрапейскага выбару давер з'яўляецца неабходнай умовай сумеснай працы.

Дадзенае рашэнне датычыцца выключна членства Аляксандры Мамаевай у спісе Еўрапейскі выбар і не закранае яе мандат дэлегата Каардынацыйнай рады трэцяга склікання", — гаворыцца ў заяве, якую атрымала Еўрарадыё.

Паводле Мамаевай, падчас унутранага абмеркавання ёй ставілі ў віну нібыта перасылку скрыншотаў закрытай перапіскі трэцім асобам, прысваенне вынікаў чужой працы і правядзенне кансультацый з іншымі фракцыямі без узгаднення.  Яна ўсе гэтыя абвінавачанні адмаўляе і кажа, што ніякіх доказаў ёй не паказалі.

Напярэдадні пасля скандалу "Еўрапейскі выбар" самастойна пакінула палітолагіня Аліна Харысава. У кастрычніку 2025 года яна запісала відэапаведамленне, паверыўшы фальшываму агенту Службы бяспекі Украіны, і заявіла, што гатовая супрацоўнічаць. Аднак ён аказаўся супрацоўнікам КДБ.

"Еўрапейскі выбар" на мінулых выбарах у Каардынацыйную раду заняў другое месца, атрымаўшы 11 мандатаў.