Беларускім фехтавальшчыкам дазволілі выступаць пад нацыянальным сцягам
Фехтавальшчыкі на спаборніцтвах у Парыжы ў 2012 годзе / Marie-Lan Nguyen / Wikimedia Commons
Міжнародная федэрацыя фехтавання FIE абвясціла пра поўнае зняцце абмежаванняў са спартсменаў з Беларусі і Расіі. Згодна з рашэннем, яны зноў змогуць удзельнічаць ва ўсіх індывідуальных і камандных спаборніцтвах пад эгідай арганізацыі на роўных з іншымі ўдзельнікамі. Вяртанне поўнага статусу пачнецца з чэмпіянату свету 2026 года ў Ганконгу.
У федэрацыі ўдакладнілі, што спартсменам будзе дазволена выступаць пад нацыянальнымі сцягамі, выкарыстоўваць дзяржаўную сімволіку і гімны. Такім чынам, адменены раней уведзеныя абмежаванні, уключаючы нейтральны статус. У FIE заявілі, што рашэнне адпавядае прынцыпам Алімпійскай хартыі, уключаючы недыскрымінацыю і роўнае стаўленне да ўдзельнікаў.
Раней, у 2023 годзе, федэрацыя адхіліла спартсменаў і афіцыйных асоб з Беларусі і Расіі ад міжнародных стартаў, а іх федэрацыі былі часова пазбаўлены членства. У 2025 годзе быў зроблены першы крок да змякчэння правілаў — допуск да камандных спаборніцтваў у нейтральным статусе. У маі бягучага года Міжнародны алімпійскі камітэт таксама рэкамендаваў спартыўным арганізацыям перагледзець абмежаванні ў дачыненні да беларускіх атлетаў.
