Беларускія хакеісты выступяць на чэмпіянаце свету 2027 года?

Латвійскі прадстаўнік Савета Міжнароднай федэрацыі хакея Віестурс Козіёлс абверг чуткі пра магчымае вяртанне Расіі і Беларусі на чэмпіянат свету ў наступным годзе на дарослым узроўні з нацыянальнай сімволікай. Паводле яго слоў, на ЧС-2027 ніводная з гэтых краін выступіць не зможа.

Беларускія хакеісты трапілі пад міжнародныя санкцыі пасля пачатку шырокамаштабнай расійскай агрэсіі супраць Украіны ў 2022 годзе.

Аднак напрыканцы траўня з’явілася інфармацыя, што некалькі беларускіх зборных змогуць узяць удзел у чэмпіянатах свету па хакеі ў сезоне 2026/2027. У праграму чэмпіянатаў свету на наступны сезон уключаныя мужчынская зборная U-18, жаночая юніёрская і жаночая нацыянальная зборная Беларусі. Пра вяртанне мужчынскай нацыянальнай зборнай пакуль гаворка не ішла.

Вярнуцца да міжнародных хакейных турніраў на дарослым узроўні ні беларусы, ні расіяне не змогуць. Савет Міжнародная федэрацыя хакея атрымаў запрашэнне перагледзець удзел гэтых нацыянальных каманд у турнірах, але, як падкрэсліў Козіёлс, гэта дакладна не адбудзецца хутка.

— Гэты працэс зойме месяц, два, тры ці чатыры месяцы. Наступным годам мы будзем разглядаць кожны чэмпіянат асобна, і, думаю, наступнае рашэнне Савета IIHF будзе прынята не праз месяц ці два, — цытуе Козіёлса латвійскае выданне bb.lv.