Колькасць ахвяраў у Кіеве пасля расійскага ўдару павялічылася да 24 чалавек

У Дарніцкім раёне Кіева закончылася пошукава-ратавальная аперацыя на месцы разбомбленага жылога дома, якая доўжылася 28 гадзін.

Паводле інфармацыі ДСНС Украіны, якую перадае hromadske.ua, загінулі 24 чалавекі. Сярод іх ёсць трое дзяцей, у тым ліку 12-гадовая і 15-гадовая дзяўчынкі.

Пацярпелі ад абстрэлу Кіева 48 чалавек, у тым ліку двое дзяцей. 30 чалавек удалося выратаваць.

Уладзімір Зяленскі казаў, што, паводле папярэдніх звестак, у шматпавярховік у Кіеве пацэліла ракета Х-101.

15 траўня ў Кіеве абвясцілі дзень жалобы па загінулых у выніку масіраванай атакі Расіі.

Як паведамлялася раней, у ноч на 14 траўня расійскія войскі выпусцілі па Украіне 56 ракет і 675 дронаў. Асноўны ўдар быў нацэлены на Кіеў. Супрацьпаветраная абарона збіла большую частку цэляў, але 15 ракет і 23 ударныя дроны пацэлілі па 24 лакацыях.