"Люстэрка": Былы супрацоўнік КДБ, падобна, стаў намеснікам дырэктара тэатра Купалы
Тэатр імя Янкі Купалы
Віктар Друзік займае пасаду намесніка дырэктара тэатра Купалы як мінімум з сакавіка 2026-га (змяніўшы Уладзіміра Кухціка). На сайце пра гэтага чалавека няма ніякай інфармацыі.
Хутчэй за ўсё, Друзік — гэта спецслужбіст, які ў мінулым быў начальнікам аддзела ўласнай бяспекі КДБ, піша "Люстэрка".
Паводле звестак, якія журналісты атрымалі ад "Кіберпартызан", поўны цёзка гэтага чалавека — Віктар Васільевіч Друзік — нарадзіўся ў 1956-м. Аж да канца нулявых гадоў ён быў супрацоўнікам КДБ. У 2010–2019 гадах працаваў у гандлёвым доме "Усходні", які належыць Упраўленню справамі Лукашэнкі, дзе займаў пасаду намесніка дырэктара. У 2019–2020 гадах нідзе афіцыйна аформлены не быў. З лістапада 2021 да лістапада 2024 года значыўся ў спартыўна-аздараўленчым комплексе "Фрыстайл".
Чалавек з такімі самымі данымі згадваецца на сайце "Узнагароды Беларусі". Там ён фігуруе як начальнік аддзела ўласнай бяспекі КДБ, падпалкоўнік юстыцыі, узнагароджаны ў 1997-м медалём "За бездакорную службу" I ступені.
Новы трэнд
Прызначэнне сілавікоў у кіраўніцтва беларускіх тэатраў — новы трэнд ад улад, адзначае выданне.
Вядома, што намеснікамі дырэктара Нацыянальнага тэатра оперы і балета Беларусі працуюць два падпалкоўнікі міліцыі. Гэта Вадзім Марцісевіч і Дзмітрый Кіслы. Маёр міліцыі Вячаслаў Лявоненка, які працаваў экспертам-крыміналістам у сталічным РАУС, а потым у сферы аховы, з 2024-га быў намеснікам дырэктара Беларускага дзяржаўнага тэатра лялек. А з красавіка 2026-га мужчына ўзначальвае ўстанову.
У тым жа 2024-м намеснікам дырэктара па бяспецы, рэжыме і кадрах сталічнага тэатра Горкага стаў Юрый Петрашэўскі, які раней быў намеснікам начальніка аддзела ўнутраных спраў Мядзельскага райвыканкама ў званні падпалкоўніка міліцыі.
