Мігранты з Узбекістана, якія заўчора прыехалі, просяць вярнуць іх на радзіму

Узбекскія працоўныя мігранты, якія 13 ліпеня прыбылі ў Беларусь, хочуць вярнуцца назад. Пра гэта гаворыцца ў іх звароце, апублікаваным сёння ў сацсетках. Яго заўважыла выданне "Наша Ніва".

Відэазапіс зроблены, імаверна, у Віцебску. На ім вялікая група мужчын звяртаецца да кіраўніка Андыжанскай вобласці і скардзіцца на ўмовы ў Беларусі. Паводле іх, працадаўцы паведамілі, што заробак работнікаў складзе каля 500 долараў на месяц, а аплочваць харчаванне і пражыванне яны павінны будуць самастойна.

"Ён сказаў: калі ёсць праца больш чым на 500 долараў, дык ідзіце, я больш грошай не дам. Заробак — 500 долараў, харчаванне за твой кошт, за жыллё сам плаціш", — пералічваюць мігранты. Яны сцвярджаюць, што на такія ўмовы не пагадзіўся ніхто.

Адзін з удзельнікаў запісу кажа, што пасля аплаты асноўных выдаткаў ад заробку амаль нічога не застанецца: "Каля 200 долараў пойдзе на ежу, яшчэ каля 100 — на мыла, мыццё ды іншыя побытавыя патрэбы. Дык няма ніякага сэнсу працаваць тут за 200 долараў, марнаваць час і пакутаваць".

Аўтар звароту просіць кіраўніка вобласці дапамагчы: "Чым так, лепш бы вы нас назад ва Узбекістан адправілі". Іншы ўдзельнік дадае, што на радзіме яны могуць зарабіць больш.

Афіцыйных каментароў з боку ўладаў Узбекістана пакуль няма.

Узбекскіх мігрантаў запрасіў на працу ў Беларусь Аляксандр Лукашэнка пасля таго, як не ўдалося прывезці працоўных мігрантаў з Пакістана. Першая група работнікаў з Узбекістана прыбыла ў Беларусь 13 ліпеня, у ёй — 255 чалавек. Паведамлялася, што працаваць яны будуць у сельскіх гаспадарках Віцебскай вобласці.