Стала вядома, у які ўніверсітэт паступіла ўнучка Лукашэнкі

Выпадкова стала вядома, у якім універсітэце будзе навучацца ўнучка Аляксандра Лукашэнкі.

У сацсетцы Threads рэпетытарка вырашыла пахваліцца поспехамі сваіх вучняў, якія паступілі на мэтавае навучанне ў медуніверсітэты. У адным са спісаў побач з падкрэсленым імем абітурыенткі тэлеканал "Белсат" заўважыў згадку 17-гадовай Валерыі Лукашэнка — гэта малодшая дачка Віктара Лукашэнкі.

Атрымліваецца, Валерыя паступіла на мэтавае навучанне ў Беларускі дзяржаўны медуніверсітэт. Пры мэтавым навучанні абітурыент паступае паводле асобнага конкурсу, але пасля заканчэння ВНУ павінен адпрацаваць не менш за пяць гадоў ва ўстанове, якая дала накіраванне.

Для паступлення ў медыцынскі ўніверсітэт на "мэтавае" трэба здаць адзін вусны экзамен па біялогіі, да яго дадаюць бал атэстату. Ва ўнучкі Лукашэнкі, як пазначана, максімальны бал — 200.