Магчыма, рэтранслятары ў Беларусі часам уключаюць — дарадца міністра абароны Украіны

Рэтранслятары ў Беларусі, магчыма "час ад часу працягваюць выкарыстоўвацца для нападаў на Украіну". Пра гэта 15 ліпеня заявіў дарадца міністра абароны Украіны і спецыяліст па радыётэхналогіях Сяргей Бяскрэстнаў, заўважыла выданне "Зеркало".

Як прыклад ён згадаў дронавую атаку на горад Малін у Жытомірскай вобласці зранку 15 ліпеня.

"Паводле даных нашых радараў, беспілотнік праляцеў уздоўж мяжы з Беларуссю, затым дасягнуў Карасценя, рухаючыся прама над трасай, пасля чаго павярнуў і паляцеў уздоўж чыгункі да Маліна, дзе атакаваў аўтазаправачную станцыю. Такія паводзіны характэрныя для ручнога кіравання БПЛА па відэакамеры. Адлегласць ад месца атакі да мяжы з Расіяй складае 260 кіламетраў. Гэта занадта далёка для працы па прамым радыёканале. Іншых "Шахедаў" (якія маглі б выконваць функцыю рэтранслятараў) у гэты час у паветры не было", — расказаў падрабязнасці Бяскрэстнаў.

З гэтага ён зрабіў выснову, што рэтранслятары ў Беларусі перыядычна выкарыстоўваюць для нападаў на Украіну. Канчатковыя высновы, паводле яго, зробяць профільныя службы і падраздзяленні пасля дэталёвага вывучэння сітуацыі.

Бяскрэстнаў адзначае, што Расія не можа атакаваць "Шахедамі" заходнюю частку Украіны без рэтранслятараў на тэрыторыі Беларусі. "Ці зможа Лукашэнка выстаяць перад "настойлівымі просьбамі" размясціць рэтранслятары, я не ведаю. Таксама не выключаю, што рэтранслятары могуць устанаўлівацца без ведама ўладаў Беларусі. Гэта робіцца хутка і лёгка. Таму ім варта больш уважліва сачыць за тым, што адбываецца на тэрыторыі іх краіны", — падкрэсліў ён.

19 чэрвеня прэзідэнт Украіны Уладзімір Зяленскі прапанаваў Беларусі дэмантаваць рэтранслятары, якія дапамагаюць расійскім вайскоўцам карэктаваць удары беспілотнікаў па тэрыторыі Украіны. Ён сказаў, што Украіне вядома пра чатыры такія аб'екты ў Брэсцкай і Гомельскай абласцях. На выкананне патрабавання ён адвёў тыдзень, пасля чаго паабяцаў, што Украіна ліквідуе рэтранслятары самастойна.

А ўжо 24 чэрвеня Зяленскі паведаміў, што рэтранслятары на тэрыторыі Беларусі спынілі працу яшчэ 22 чэрвеня.