На чыгунцы Германіі адбылося больш за дзве тысячы дыверсій за паўгода — BILD

14 ліпеня ў Ной-Вульмсторфе на поўначы Германіі зламыснікі пашкодзілі размеркавальны шчыт на чыгунцы. У выніку была парушаная праца важнай прыгараднай лініі Гамбург-Куксхафен: больш за 200 пасажырскіх рэйсаў адмянілі, 19 грузавых саставаў былі раптоўна спыненыя на паўдарозе.

Як піша BILD, гэтая дыверсія стала толькі часткай хвалі нападаў на нямецкую чыгунку. Выданне спасылаецца на сакрэтную справаздачу нямецкага чыгуначнага аператара Deutsche Bahn. Агулам за першую палову 2026 года зафіксавана 2200 выпадкаў падпалаў, крадзяжоў металу і небяспечных умяшанняў ў працу чыгуначнай інфраструктуры. Гэта на 7% больш, чым за першае паўгоддзе 2025-га.

Напрыклад, у мінулую пятніцу, 10 ліпеня, адбыўся падпал кабельных каналаў, што спыніла сувязь паміж Кёльнам і Дзюсельдорфам. Адказнасць за дыверсію ўзяла на сябе крайне левая групоўка Kommando Angry Birds.

Ад нападаў церпяць не толькі пасажыры. Калі спыняюцца другарадныя лініі, па якіх ідуць цяжкія грузаперавозкі, заводы застаюцца без забеспячэння, што наносіць сур'ёзны ўрон усёй нямецкай эканоміцы.