Мінскі чыноўнік выставіў беларусам рахунак за паход да лекара

Наведванне тэрапеўта абыходзіцца беларускаму бюджэту ў 45 рублёў, а стаматолага — у 70 рублёў, калі няма складанага лячэння. Такія сумы назваў у інтэрв'ю БТ старшыня камітэта па ахове здароўя Мінгарвыканкама Юрый Горбіч.

Таксама чыноўнік расказаў, што на знаходжанне ў стацыянары на тэрапеўтычным ложку на аднаго чалавека вылучаюць 430-440 рублёў, а на рэанімацыйным — 1,7 тыс. рублёў без уліку лекаў і выдаткаў на абсталяванне, зарплаты.

Таксама Горбіч паскардзіўся на людзей, якія выклікаюць хуткую дапамогу з неапраўданых прычынаў.

"Напрыклад, хуткую выклікаюць з падставай "баліць галава", а па прыездзе аказваецца, што ў чалавека напярэдадні здарылася злоўжыванне спіртнымі напоямі, і пасля гэтага ў яго баліць галава. Яшчэ адна рэальная сітуацыя — чалавека завозяць у бальніцу хуткай дапамогі, а ён кажа: "Дзякуй, што давезлі. Я тут насупраць жыву". Адмаўляецца ад шпіталізацыі і сыходзіць. І гэтыя выпадкі нават не пра грошы (а адзін выклік хуткай дапамогі каштуе 240 з лішнім рублёў), а пра неабходнасць медыцынскай брыгады ў іншым месцы. Можа быць, дзесьці не хопіць менавіта яе для выратавання жыцця, бо прадбачыць, колькі выклікаў будзе ў кожную канкрэтную хвіліну, немагчыма", — сказаў ён.

У тэлесюжэце падкрэсліваецца, што для пацыентаў беларуская медыцына бясплатная, але з бюджэту на яе вылучаюцца грошы. Пры гэтым прапагандысты традыцыйна не згадалі, што бюджэт краіны складаецца з падаткаў, якія выплачваюць самі беларусы.