Ад 8 рублёў за гадзіну да 2600 у месяц. Агляд вакансій для школьнікаў і студэнтаў

Навучальны год і сесія засталіся ззаду, і для студэнтаў (як і для старшакласнікаў) надыходзіць кароткі перыяд, калі можна канвертаваць вольны час у кэш.

Дзе шукаць першую падпрацоўку? На які даход можна разлічваць? Як пераканацца, што працу аплацяць, а працадаўца — добрасумленны?

Каб дапамагчы маладым беларусам, журналістка Еўрарадыё вывучыла вакансіі, якія прапануе дзяржаўная служба занятасці, а таксама ад імя суіскальніцы паразмаўляла са спецыялісткай Камітэта па працы, занятасці і сацыяльнай абароне Мінгарвыканкама.

Студэнтам

Для тых, каму ўжо споўнілася 18 гадоў, у Мінску прапануюць вялікі спіс вакансій, але чакаць залатых гор не варта. У асноўным гэта праца “на нагах” або цяжкая фізічная праца.

Затое тут менш абмежаванняў па графіку, а значыць, і шанцы зарабіць крыху больш, чым проста “на марозіва”, вышэйшыя.

• Грамадскае харчаванне і сэрвіс: у “Мак.бай” члену брыгады 3-га разраду плацяць 8,5 рубля за гадзіну, а 4-га — 12 рублёў. Гэта стабільная праца, але яна патрабуе вытрымкі. У сетцы “Фэмілі Фуд” поварам і касірам прапануюць каля 7,26–8,5 рубля за гадзіну. Калі вас цягне да вады, то ў аквапарку “Лябяжы” інструктарам-выратавальнікам абяцаюць ад 1200 рублёў за месяц. Матросы-выратавальнікі на пастах ТВВОД атрымліваюць каля 1173 рублёў.
   
• Гандаль і лагістыка: у рознічным гандлі тыпу “Лібрэтыка” (сетка “Суседзі”) або “Санты” можна ўладкавацца прадаўцом (7,36 рубля за гадзіну) або касірам (7,91 рубля за гадзіну). Праца грузчыкам там жа прынясе каля 8,18 рубля за гадзіну. Больш сур'ёзныя заробкі прапануюць у лагістыцы: у кампаніі “АЛІДЗІ-Вэст” кладаўшчык можа зарабіць 2000 рублёў, а мерчандайзер — каля 1600 рублёў.
   
• Медыцына (для профільных ВНУ): гэта, бадай, самая высокааплатная часовая праца, але толькі для сваіх. Студэнты-медыкі пасля 4-га курса могуць разлічваць на 1465–2645 рублёў у РНПЦ “Маці і дзіця”. Пасля 3-га курса ў 10-й клінічнай бальніцы плацяць каля 1160 рублёў.
   
• Будаўніцтва і заводы: калі вы гатовыя да складаных умоў працы, на МАЗе слесарам-электрамантажнікам плацяць 1700 рублёў, а штампоўшчыкам — 1200 рублёў. Дарожны рабочы, заняты добраўпарадкаваннем горада, можа атрымліваць каля 2000 рублёў.

Школьнікам

Калі вам ад 14 да 18 гадоў, знайсці працу складаней, а заробкі будуць больш сціплымі праз заканадаўчыя абмежаванні па працягласці працоўнага часу. Тым не менш у Мінску ёсць некалькі правераных варыянтаў.

А як справы ў рэгіёнах?

Калі вы жывяце не ў Мінску, выбар усё роўна ёсць — у базе дзяржаўнай службы занятасці зараз размешчана больш за 18 тысяч вакансій для аплатнай часовай занятасці па ўсёй краіне (для непаўналетніх прапануюць больш за 9 тысяч працоўных месцаў).

Сферы дзейнасці розныя, аднак асноўная колькасць прапаноў у рэгіёнах, што цалкам чакана, сканцэнтравана ў сельскай гаспадарцы і сферы добраўпарадкавання тэрыторый.

Вось некалькі прыкладаў:

• Сельскагаспадарчыя работы і “бітва за ўраджай”: у Пінскім раёне (ААТ “Парахонскае”) падсобным рабочым у полі прапануюць фіксаваны дзённы заробак — 41 рубель. У Клецкім раёне за ручную праполку пасеваў аплата здзельная: колькі гектараў праполеш, столькі і заробіш. Самыя высокія стаўкі за змену мы знайшлі ў Гродзенскай вобласці: у аграгарадку Алекшыцы за ўкрыццё сіласных ям плацяць 55–60 рублёў, а за ўборку тэрыторыі ў Масалянах можна атрымаць ад 50 да 70 рублёў за дзень.
   
• Збор ягад у Магілёве: гэта ідэальны варыянт для тых, хто хоча адразу бачыць вынік сваёй працы. На зборы ягад у ТАА “АРНІКА-Агра” аплата залежыць ад вашай хуткасці і віду ўраджаю. За агрэст плацяць ад 0,42 да 1,20 рубля за кілаграм, а за белыя і чырвоныя парэчкі — ад 0,87 да 1,6 рубля. Да гэтага часта дадаюцца прэміі за перавыкананне нормы.
   
• Добраўпарадкаванне і ЖКГ: калі праца ў полі не прываблівае, можна ўладкавацца ў гарадскія службы. У Магілёве падсобным рабочым у сістэме эксплуатацыі жыллёвага фонду плацяць 5,15 рубля за гадзіну. У Вялікай Бераставіцы за абкошванне тэрыторый і зграбанне травы пасля пакосу можна зарабіць 50–60 рублёў за змену.

Пра што важна памятаць

Каб не натрапіць на “развод” і не адпрацаваць месяц бясплатна, у Камітэце па працы, занятасці і сацыяльнай абароне Мінгарвыканкама раяць карыстацца толькі дзяржаўным парталам ДСЗ. За інфармацыю на іншых камерцыйных сайтах чыноўнікі адказнасці не нясуць.

На афіцыйным партале ёсць укладка “Часовая занятасць”, куды інфармацыя паступае наўпрост ад правераных наймальнікаў. Ніхто не возьме вас “проста так” — работнікаў афармляюць альбо па працоўнай кніжцы, альбо прапануюць падпісаць афіцыйны дагавор падраду.

Схема дзеянняў простая:

1. Выбіраеце вакансію на партале.
2. Звязваецеся з працадаўцам і абмяркоўваеце ўмовы.
3. Калі ўсё задавальняе і вас гатовы ўзяць, едзеце ў цэнтр занятасці па месцы жыхарства.
4. Там вам выпісваюць афіцыйнае накіраванне, з якім вы ўжо ідзяце працаўладкоўвацца.

Важна: у аб’явах на сайце зарплату звычайна ўказваюць за поўную стаўку (гэта значыць за 8-гадзінны працоўны дзень). Але паколькі падлеткам па законе нельга працаваць поўны дзень, выніковая сума на картцы будзе залежаць ад рэальна адпрацаваных гадзін або аб’ёму выкананых задач.

Мінімальны парог пры поўнай адпрацоўцы месяца зараз складае 858 рублёў. Але ваш асабісты працоўны ліміт у перыяд канікулаў строга абмежаваны:

• ад 14 да 16 гадоў — не больш за 4 гадзіны 36 хвілін у дзень;
• ад 16 да 18 гадоў — не больш за 7 гадзін у дзень.

Таксама трэба памятаць, што нават на самую простую падпрацоўку ў Мінску вас не аформяць без медыцынскай даведкі з паліклінікі. А калі вам яшчэ не споўнілася 16 гадоў, абавязкова патрэбна пісьмовая згода бацькоў — без яе дагавор не заключаць.