“Не адлюстроўваюць сітуацыю”. ЕГУ адказаў на прэтэнзіі студэнтаў пра правал бяспекі

На Еўрарадыё выйшаў тэкст пра тое, як Еўрапейскі гуманітарны ўніверсітэт у Літве рэагуе на факты рэпрэсій з боку беларускіх улад супраць студэнтаў і выкладчыкаў ВНУ. Яны пачаліся пасля прызнання ЕГУ “экстрэмісцкай арганізацыяй” вясной 2026 года.

У матэрыяле студэнты, якія пагадзіліся на размову, выказалі шэраг прэтэнзій да адміністрацыі ўніверсітэта. Яны скардзіліся, што застаецца нявырашаным пытанне легалізацыі ў Літве на падставе навучання, што псіхалагічнай дапамогі ад ЕГУ даводзіцца доўга чакаць, а рэкамендацыі ўніверсітэта адносна таго, як паводзіць сябе ў сітуацыі магчымых ператрусаў і пераследу, маюць абцякальны характар.

Мы перадалі гэтыя заўвагі прэс-службе ўніверсітэта і атрымалі адказ.

Прыводзім яго цалкам.

— ЕГУ выдатна разумее выклікі і трывогу, з якімі сёння сутыкаюцца ўніверсітэцкая супольнасць і члены сем’яў студэнтаў і супрацоўнікаў. З моманту прызнання ўніверсітэта экстрэмісцкай арганізацыяй ЕГУ паслядоўна імкнецца забяспечыць бяспеку сваёй супольнасці, бесперапыннасць навучання, а таксама доступ да актуальнай інфармацыі і індывідуальнай дапамогі.

Адразу пасля таго як улады Беларусі абвясцілі ЕГУ экстрэмісцкай арганізацыяй, універсітэт праінфармаваў супольнасць пра магчымыя рызыкі і рэкамендаваў кожнаму адказна ацаніць сваю індывідуальную сітуацыю. Універсітэт заўсёды падкрэслівае, што асобы, якія знаходзяцца на тэрыторыі Літвы, карыстаюцца абаронай, прадугледжанай заканадаўствам і дзяржаўнымі інстытутамі Літвы, у той час як магчымасці ўніверсітэта аказваць дапамогу асобам, якія знаходзяцца ў Беларусі, адсутнічаюць або істотна абмежаваныя.

Што датычыцца рэкамендацый у сувязі з ператрусамі, якія праводзяцца беларускімі органамі, важна адзначыць, што ЕГУ з’яўляецца ўніверсітэтам і не можа прадастаўляць юрыдычныя або практычныя інструкцыі адносна дзеянняў у выпадках рэпрэсій, ператрусаў ці допытаў. Такія кансультацыі могуць даваць толькі праваабарончыя арганізацыі або спецыялізаваныя юрысты. Універсітэт рэгулярна дзеліцца інфармацыяй пра даступныя крыніцы дапамогі і накіроўвае да іх членаў сваёй супольнасці. Акрамя таго, універсітэт арганізуе індывідуальныя кансультацыі з юрыстамі.

Па пытаннях міграцыі ўніверсітэт пастаянна ўзаемадзейнічае з Міністэрствам замежных спраў Літвы, Дэпартаментам міграцыі і іншымі кампетэнтнымі ўстановамі. Супольнасці рэгулярна прадастаўляецца актуальная інфармацыя.

Псіхалагічная дапамога для супольнасці ЕГУ даступная і, пры неабходнасці, была дадаткова ўзмоцненая. Універсітэт таксама распаўсюджвае інфармацыю пра магчымасці атрымання дапамогі звонку і пастаянна ацэньвае, якім чынам найбольш эфектыўна адказваць на патрэбы сваёй супольнасці.

Сцвярджэнні пра тое, што студэнтам не хапае інфармацыі, не ў поўнай меры адлюстроўваюць рэальную сітуацыю. На працягу апошніх месяцаў універсітэт рэгулярна абнаўляе наяўную інфармацыю і арганізуе розныя сустрэчы для абмеркавання актуальных пытанняў. Для аператыўнага рэагавання на індывідуальныя запыты быў створаны асобны канал камунікацыі.

Мы цэнім актыўнасць студэнтаў і іх імкненне прыцягнуць увагу міжнародных партнёраў і еўрапейскіх інстытутаў да сітуацыі, якая склалася. ЕГУ пастаянна падтрымлівае дыялог з донарамі, дзяржаўнымі ўстановамі Літвы і міжнароднымі партнёрамі, імкнучыся забяспечыць максімальна шырокую падтрымку сваёй супольнасці. Мы лічым, што ўдзел усіх членаў супольнасці і адкрыты дыялог дапамагаюць яшчэ больш выразна падкрэсліць сур’ёзнасць сітуацыі, якая склалася, і шукаць доўгатэрміновыя рашэнні.

Важна падкрэсліць, што сам ЕГУ з’яўляецца аб’ектам гэтай сітуацыі. Нягледзячы на складаныя абставіны, універсітэт працягвае працаваць над тым, каб абараніць сваю супольнасць, забяспечыць бесперапыннасць навучання і дзейнічаць адказна, у адпаведнасці з заканадаўствам Літвы і Еўрапейскага саюза.