Беларускі паэт запісаў альбом з 33 песень, створаных з дапамогай штучнага інтэлекту

Паэт Леанід Пранчак запісаў альбом песень "Жорны" на свае вершы. Музыку для 33 твораў ён напісаў з дапамогай штучнага інтэлекту.

Для абазначэння сваіх твораў Пранчак стварыў слова "песняверш". У сваім акаўнце на Фэйсбуку ён так патлумачыў новы жанр:

"Песнявершы — новы жанр беларускай музыкі і паэзіі, які я прыдумаў, калі прадзюсіраваў і генерыраваў музыку на свае вершы падчас працы над альбомам ЖОРНЫ, аб'яднаўшы ў адно два словы і два паняцці: верш і песня.
Такім чынам слова "Песняверш" утварае новую лінгвістычную і мастацкую адзінку. Гэта адмаўленне ад звыклага падзелу песні на "тэкст" і "музыку".

Пранчак кажа, што яго альбом стаў "першым прыкладам маштабнага і свядомага стварэння цэлага пласта нацыянальнай культуры, дзе штучны інтэлект працуе на захаванне і развіццё беларускай музычнай і паэтычнай аўтэнтычнасці і самадастатковасці".

Творца падкрэслівае, што пры стварэнні музыкі з дапамогай ШІ браў не першы-лепшы прапанаваны варыянт, а дамагаўся неабходнай перадачы эмоцый.

Леанід Пранчак — аўтар папулярных у 1990-я гады песень ("Даставай, Язэп, гармонік", "Цік-так, ходзікі" ды інш.).