Сям’я беларусаў у Грузіі просіць прызнаць неканстытуцыйным закон аб міжнароднай абароне

Сям’я беларусаў у Грузіі хадайнічае, каб асобныя нормы закона "Аб міжнароднай абароне" былі прызнаныя неканстытуцыйнымі. Дзеля гэтага беларусы звярнуліся ў Канстытуцыйны суд краіны. Пра гэта паведамляе выданне "Позірк" са словаў праваабаронцы Рамана Кісляка. Паводле ягонай інфармацыі, гэта першы зварот беларусаў у КС Грузіі.

Беларусы просяць прызнаць неканстытуцыйнымі п. 6 і 7 арт. 32 закона "Аб міжнароднай абароне". Там гаворыцца, што пры адмове пасля паскоранага разгляду заявы аб наданні міжнароднай абароны асоба страчвае статус просьбіта прытулку, такога чалавека можна неадкладна выдварыць ці экстрадзіраваць. Акрамя таго, такі замежнік пазбаўляецца права на юрыдычную дапамогу і вызваленне ад дзяржаўных збораў пры абскарджанні ў судзе.

Пазоўнікі сцвярджаюць, што гэтыя нормы супярэчаць п. 1 і 3 арт. 31 (справядлівы судовы разгляд) і арт. 33 (правы замежнікаў і асоб без грамадзянства, уключаючы права на прытулак) Канстытуцыі Грузіі.

Змены ў закон набылі моц 1 кастрычніка 2025 года. Беларусы адзначаюць, што пасля гэтага становішча просьбітаў прытулку і тых, хто прэтэндуе на гэты статус, пагоршала.

"Справа па адмове сям’і ў міжнароднай абароне знаходзіцца на разглядзе ў Тбіліскім гарадскім судзе. І паводле новага закона, нягледзячы на разгляд справы ў судзе, Дэпартамент міграцыі можа затрымаць для дэпартацыі тых людзей, якім было адмоўлена паводле паскоранай працэдуры. Такія выпадкі ўжо былі, таму мы і звяртаемся ў Канстытуцыйны суд", — пракаментаваў Кісляк.

Ад 2019 года грузінскія ўлады адхілілі ўсе 80 разгледжаных хадайніцтваў беларускіх грамадзян аб наданні прытулку. Гэта вынікае з праведзенага "Позіркам" аналізу даных мясцовай паліцыі.