Па справе аб забойстве расійскага карыкатурыста ў Польшчы затрымалі беларуса

15 чэрвеня ў польскім горадзе Бяла-Падляска, размешчаным недалёка ад мяжы з Беларуссю, застрэлілі 44-гадовага грамадзяніна Расіі. Як пішуць польскія СМІ, гэта антыпуцінскі мастак-карыкатурыст, акцыяніст і блогер Сямён Скрапецкі.

Забойства адбылося недалёка ад консульства Беларусі. У тым жа раёне пражываў і мастак. Паводле звестак СМІ, нападнік зрабіў у яго серыю стрэлаў з агнястрэльнай зброі з блізкай адлегласці. Медыкі не змаглі выратаваць мужчыну.

Паліцыя перакрыла вуліцы пасля інцыдэнту. На дарогах выставілі патрулі. У сацсетках з'явіліся відэа, як паліцыянты затрымліваюць мужчыну каля ўваходу на тэрыторыю консульства Беларусі. У СМІ пішуць, што гэта грамадзянін Беларусі, які бег у бок консульства.

У тг-канале DzikMedia адзначаюць, што затрыманы беларус быў таксоўцам. Як мяркуецца, ён быў выпадкова ўцягнуты ў падзеі: "Паводле папярэдніх звестак, менавіта ён прывёз з Варшавы асобаў, якія могуць быць датычныя да злачынства. Пры гэтым няма інфармацыі, што ён ведаў пра іх намеры або пра тое, што яны маглі быць забойцамі".

Паліцыя пасля затрымання беларуса таксама заявіла, што пошукі выканаўцы працягваюцца.

Сямён Скрапецкі за гадзіну да забойства паведамляў, што яму пагражаюць "рускія патрыёты". 

Мастак вядомы карыкатурамі і сатырычнымі малюнкамі на Уладзіміра Пуціна, Рамзана Кадырава, Аляксандра Лукашэнку ды іншых палітыкаў. Ён падтрымліваў беларускія акцыі, данаціў на УСУ.