Вялікабрытанія перахапіла танкер расійскага “ценявога флоту” ў Ла-Маншы

Брытанскія ўзброеныя сілы перахапілі нафтавы танкер Smyrtos “ценявога флоту” Расіі ў Ла-Маншы ў ноч на 14 чэрвеня. Пра гэта паведаміў прэм'ер-міністр краіны Кір Стармер.

Аперацыя працягвалася шэсць гадзін. У ёй удзельнічалі камандас Каралеўскай марской пяхоты, спецыяліcты Нацыянальнага агенцтва па барацьбе са злачыннасцю, самалёты Марской авіяцыйнай групы і Каралеўскіх ВПС, а таксама караблі HMS Sutherland і HMS Ledbury. Аперацыя праводзілася ў цесным узаемадзеянні з Францыяй.

Танкер Smyrtos ходзіць пад сцягам Камеруна. Паводле BBC, 5 чэрвеня ён выйшаў з расійскага порта Усць-Луга пад Санкт-Пецярбургам, а ў суботу перасёк Ла-Манш. Судна трапіла пад санкцыі яшчэ ў ліпені 2025 года. Тады яно змяніла сцяг і назву з Myrtos на Smyrtos.

Цяпер танкер затрыманы і будзе знаходзіцца пад наглядам каля паўднёвага ўзбярэжжа на час расследавання.

— Гэтая паспяховая аперацыя наносіць яшчэ адзін удар па Расіі і нагадвае тым, хто падтрымлівае вайну Пуціна ва Украіне, што мы не дазволім ім схавацца, — напісаў Стармер у сацсетцы Х.

Украіна падзякавала Вялікабрытаніі і заклікала Еўропу тэрмінова прыняць заканадаўчыя меры, якія дазволяць не толькі затрымліваць танкеры, але і канфіскоўваць перавозімую імі нафту.

Расія выкарыстоўвае “ценявы флот” з больш за 700 судоў для абыходу міжнародных санкцый. Праз яго перавозіцца 75% расійскай нафты, якая падпадае пад абмежаванні. Вялікабрытанія ўжо ўвяла санкцыі супраць больш за 500 такіх судоў.