Польскі шпіталь патрабуе ад Кацярыны Ваданосавай больш за 20 тысяч долараў

Беларускую журналістку Кацярыну Ваданосаву выклікаюць у польскі суд. Мясцовая клініка патрабуе спагнаць з яе 78 313,99 злотых (больш за 20 тысяч долараў у эквіваленце). Ёй выставілі рахунак за аперацыю маці, яе рэанімацыю і дзеянні post mortem. Пра гэта журналістка расказала на сваёй старонцы ў Фэйсбуку.

Нэлі Ваданосава ў снежні 2025-га перанесла інсульт, пасля чаго яе шпіталізавалі. У выніку бюракратычнай памылкі яна засталася без медстрахоўкі, хаця была ў працэсе атрымання міжнароднай абароны ў Польшчы. Даныя Нэлі Ваданосавай не былі своечасова ўнесеныя ў базу Упраўлення па справах замежнікаў (Urząd do Spraw Cudzoziemców). Тады ж BYSOL абвесціў збор на дапамогу сям’і Ваданосавай. Аднак на пачатку 2026-га маці журналісткі памерла.

Увесну 2026 года Кацярына Ваданосава паведаміла, што сям’я змагла даказаць памылку і рахунак за лячэнне яе маці будзе аплочаны польскай дзяржавай. Грошы, якія засталіся ад дабрачыннага збору, яна ахвяравала на падтрымку беларускіх палітвязняў.

"Я была ўпэўненая, што Ужонд да спраў іншаземцаў выслаў яму тыя ж дакументы, якія выслаў мне. Ліст ад УДСЦ пра тое, што аплата ўскладаецца на Petra Medica і мая мама была застрахаваная ў момант інсульту і смерці, я атрымала 26 сакавіка, неўзабаве пасля гэтага пералічыла рэшту збору назад у BYSOL", — расказвае журналістка.

Да таго ж суд патрабуе цягам двух тыдняў падаць пасведчанне аб нараджэнні. Кацярына кажа, што бегала ў адпаведнае польскае ўпраўленне "паміж кропельніцай ды ўколам" (яна сама працягвае лячэнне ад анкалагічнага захворвання): "Умейсцовене робіцца месяц. Расплакалася ў ЗАГСе ад бяссілля".

Дапамагчы адстойваць свае правы ў судзе ёй паабяцала ранейшая адвакатка.