Аспіранта, які змагаўся за ложка-месца ў інтэрнаце, выключылі з інстытута
Паводле рашэння Прэзідыума Акадэміі навук, Аляксея Паўлоўскага адлічылі з аспірантуры яшчэ 5 снежня, аднак пра гэта ён дазнаўся толькі сёння.
У рашэнні, якое ён атрымаў на рукі, не пазначана прычына ягонага адлічэння. Аляксей адзначае, што збіраецца дабіцца вяртання ў аспірантуру Інстытута фізіялогіі праз суд.
Нагадаем, што прычынай канфлікту аспіранта з Акадэміяй навук стаў той факт, што яму не далі ложка-месца ў інтэрнаце. Пасля гэтага Аляксей Паўлоўскі напісаў скаргу ў Адміністрацыю прэзідэнта і Міністэрства адукацыі.
З гэтага моманту ў хлопца пачаліся праблемы з адміністрацыяй установы — яму не зацвердзілі навуковага кіраўніка і пачалі падвяргаць штодзённаму псіхалагічнаму ціску. Іншых аспірантаў, якія падпісаліся пад ягонай заявай, пад пагрозамі прымусілі адклікаць свае подпісы.
