У Доме Ваньковічаў цяпер можна справіць уласны дзень народзінаў
Філіял Нацыянальнага мастацкага музея адчыніўся пасля рамонту.
Пасля доўгага перапынку музей будзе не толькі радаваць наведнікаў экскурсіямі і музычнымі вечарамі ў доме мастака Валенція Ваньковіча на вуліцы Інтэрнацыянальнай, але і прапаноўваць новыя віды актыўнасці. Сайт музея запрашае, напрыклад, адсвяткаваць у старадаўніх сценах свой дзень народзінаў. Як адказалі Еўрарадыё ў музеі, гэта будзе каштаваць “каля 50 тысяч плюс уваходныя квіткі”. Праграма цягнецца 2 гадзіны — што праўда, шампанскае і аліўе ніхто прынесці не дазволіць, бо праграма “культурна-эстэтычная”. Фактычна — індывідуальная экскурсія ў ваш гонар.
Апроч дня народзінаў, музей прапануе святкаваць разам іншыя ўрачыстыя падзеі — напрыклад, гадавіну шлюбу.
З нагоды адкрыцця сёння, 9 чэрвеня а 16.00 адбудзецца канцэрт класічнай музыкі — Баха, Моцарта, Шапэна — у выкананні піяністкі Дар’і Мядвецкай, студэнткі Беларускай дзяржаўнай акадэміі музыкі. А 16 чэрвеня а 16.00 у межах паректа “Музыка ў музеі” будзе выступ Наталлі Сазановіч (фартэпіяна) і Ірыны Гаўрылковіч (вакал), якія выканаюць рускія рамансы канца ХІХ — пачатку ХХ стагоддзя.
