Віцебскіх студэнтаў адправілі на будоўлю без сродкаў абароны і нават без вады
Віцебскія студэнты на будоўлі / Мінпрацы
Студэнтаў віцебскага будатрада адправілі працаваць з парушэннямі, якія маглі пагражаць жыццю і здароўю. Гэта выявіла інспекцыя працы, звярнуў увагу тг-канал vitebsk_info.
Інспекцыя працы праверыла студатрады, якія працавалі на аб'ектах адной з прыватных будаўнічых арганізацый Віцебска. Высветлілася, што на аб'ектах не было сігнальных агароджаў і знакаў бяспекі ў небяспечных зонах. Студэнтаў дапускалі да работ без сродкаў індывідуальнай абароны.
Акрамя таго, на будоўлі не было пітнога водазабеспячэння — гэта значыць, людзей улетку пакінулі без нармальнага доступу да вады.
Частку парушэнняў кіраўніцтва ліквідавала проста пры інспектары. Інспекцыя працы загадала выправіць усё ў самы кароткі тэрмін.
