У чэрвені Польшча ўдвая больш адмаўляла беларусам у міжнароднай абароне, чым пагаджалася

Польшча рэзка знізіла выдачу міжнароднай абароны беларусам. Пра гэта сведчыць статыстыка ўпраўлення па справах замежнікаў, якую прааналізавала выданне MOST.

У чэрвені польскія чыноўнікі вынеслі 21 рашэнне аб наданні беларусам статусу бежанца і яшчэ чатыры — аб дадатковай абароне. Адмоўныя рашэнні былі прынятыя па 52 заявах. Разгляд яшчэ 13 справаў прыпынены.

Агулам адмовы склалі 57,8% разгледжаных справаў, што з'яўляецца беспрэцэдэнтна высокім паказчыкам. Для параўнання: у студзені-траўні 2026-га адмоўныя рашэнні складаліа толькі 4,4%, у 2025 годзе іх было 5,5%, а ў 2024-м — 5,4%.

Выданне адзначае, што сітуацыя рэзка пагоршала ў траўні. Так, за першыя чатыры месяцы 2026 года беларусы атрымалі агулам 14 адмоваў у наданні абароны, а за травень было вынесена 17 негатыўных рашэнняў.

Як паведамлялася раней, польскія чыноўнікі ўсё часцей мяркуюць, што беларусам больш не пагражае палітычны пераслед за падзеі 2020 года.