Стала вядома, колькі ўзбекскіх мігрантаў плануецца прывезці ў Беларусь

У Беларусь плануецца перавезці пяць тысяч працоўных мігрантаў з Андыжанскай вобласці Узбекістана. Пра гэта паведамляе прэс-служба прэзідэнта Узбекістана Шаўката Мірзіёева.

На першым этапе плануецца на 13 прадпрыемствах Віцебскай і іншых абласцей Беларусі плануецца ўладкаваць на працу 1100 грамадзян Узбекістана. Пачынаючы з верасня штомесяц плануецца ўвозіць на працу ў Віцебскую вобласць 500 жыхароў Андыжанскай вобласці, пакуль не дойдзе да пяці тысяч. Для гэтага ў Віцебску адкрыюць прадстаўніцтва Агенцтва міграцыі Узбекістана.

Паведамляецца, што сёння Мірзіёеў азнаёміўся з прэзентацыяй па рэалізацыі дамоўленасцяў аб пашырэнні міжрэгіянальнага супрацоўніцтва, дасягнутых падчас візіту ў Беларусь.

"Асаблівая ўвага была нададзеная пытанням арганізаванага працаўладкавання грамадзян", — адзначаюць у прэс-службе Мірзіёева. Аднак больш падрабязна пра гэта не гаворыцца нічога.

Як паведамлялася раней, у Беларусь 13 ліпеня прыбылі 255 працоўных мігрантаў з Узбекістана. Сёння яны апублікавалі ў сацсетках відэа, у якім абураюцца ўмовамі як пражывання, так і працы. У сваім відэазвароце ўзбекі просяць вярнуць іх на радзіму, скардзяцца, што пры заробку ў 500 долараў давядзецца яшчэ самастойна аплочваць жыллё і харчаванне.

Беларускія прапагандысты ўжо кінуліся абвяргаць заявы ўзбекскіх мігрантаў і заявілі, што ў кепскіх умовах жылі толькі пяць чалавек у групе і толькі адну ноч. А велічыня заробкаў, маўляў, абмяркоўвалася загадзя.