За "Гуканне вясны" ў Гомелі асудзілі яшчэ траіх чалавек

У Гомелі яшчэ траіх чалавек асудзілі за ўдзел у абрадзе "Гуканне вясны", які адбыўся ў сакавіку. Судзілі іх паводле адміністрацыйнага артыкула, абвінаваціўшы ў правядзенні несанкцыянаванага масавага мерапрыемства, піша "Флагшток".

Абрад адбываўся 21 сакавіка, а тэрмін прыцягнення да адказнасці паводле КаАП — два месяцы з дня здзяйснення правапарушэння. Таму за ўдзел у святкаванні міліцыянты змаглі пакараць яшчэ некалькі чалавек на нібыта законных падставах.

Раней паведамлялася, што мінімум адзін удзельнік "Гукання вясны" атрымаў 15 сутак арышту. Пяць чалавек былі аштрафаваныя на 100 базавых велічыняў (4500 рублёў, ці больш за 1,5 тысячы долараў). Чалавеку, якога палічылі арганізатарам, прысудзілі штраф у 150 базавых (6750 рублёў, ці амаль 2,3 тысячы долараў). Сярод аштрафаваных, як паведамлялі СМІ, быў нават участковы інспектар міліцыі Віктар Шыпкоў — аматар фальклору. Пасля пакарання яго не звольнілі — ён і цяпер значыцца ўчастковым у базе МУС.

Рэстаран "Спадчына", дзе гукалі вясну, на нейкі час закрываўся, але затым зноў адкрыўся. Аднак мерапрыемстваў на тэму беларускай культуры і кухні тут больш не анансуюць.